जवळा येथील प्राथमिक आरोग्य केंद्र कुलूपबंद अवस्थेत; नागरिकांची प्रचंड गैरसोय ;

नागरिकांची प्रचंड गैरसोय ; सरपंच उपसरपंचसह सर्व ग्रामपंचायत सदस्यांचा आरोग्य केंद्रात तासभर ठिय्या

शासनाचा गलेलठ्ठ पगार घेऊनही गावोगावी असणाऱ्या प्राथमिक आरोग्य केंद्र आणि उपकेंद्रमधे आरोग्य अधिकारी, आरोग्य सेवक फिरकत नसल्याचे भीषण वास्तव समोर येऊ लागले आहे. सांगोला तालुक्यातील राजकीय आणि सामाजिकदृष्ट्या सर्वात संवेदनशील गाव असलेल्या जवळा येथील प्राथमिक आरोग्य केंद्रात एकही आरोग्य अधिकारी किंवा साधा कर्मचारी उपस्थित नसल्याने कोट्यावधी रुपये खर्च करून उभा केलेले आरोग्य केंद्र अधिकारी कर्मचारी आभवी बंद ठेवावे लागत असल्याचा धक्कादायक प्रकार शनिवार दि. १० डिसेंबर रोजी उघडकीस आला आहे.

जवळा या गावाच्या आसपास असलेल्या वाड्यावर त्या व छोटी-मोठी खेड्यातील अनेक रुग्ण वैद्यकीय सेवेसाठी जवळा येथील प्राथमिक आरोग्य केंद्र व जवळपास असलेल्या उपकेंद्रावर अवलंबून आहेत. किरकोळ दुखापत अपघात तसेच अन्य उपचारासाठी नागरिकांना शासकीय आरोग्य केंद्र आणि उपकेंद्राचा आधार घ्यावा लागतो. सर्वसामान्य जनतेच्या सेवेसाठी उभा केलेल्या जवळा येथील प्राथमिक आरोग्य केंद्रात येथील वैद्यकीय अधिकारी फिरकतच नसल्याने हे आरोग्य केंद्र चक्क दिवसाढवळ्या कुलूप बंद अवस्थेत ठेवावे लागत आहे. जवळा व परिसरातील तब्बल २० ते २५ पुरुष आणि महिला रुग्ण वैद्यकीय उपचारासाठी या आरोग्य केंद्रात आले असता त्यांना कुलूप बंद अवस्थेत असलेले आरोग्य केंद्र पहायला मिळाले. दरम्यान वारंवार या आरोग्य केंद्रात एकही अधिकारी किंवा कर्मचारी उपस्थित नसल्याने बहुतांशी हे आरोग्य केंद्र बंदच असल्याचे येथील नागरिक सांगतात. दरम्यान वैद्यकीय उपचारासाठी प्राथमिक आरोग्य केंद्रात आलेल्या २० ते २५ गरजू रुग्णांनी तात्काळ येथील सरपंच उपसरपंच व ग्रामपंचायतीशी संपर्क साधून त्यांना सदरचा प्रकार सांगितला. यानंतर सरपंच, उपसरपंच तसेच सर्व ग्रामपंचायत सदस्यांनी तात्काळ येथील प्राथमिक आरोग्य केंद्रात जाऊन प्रत्यक्ष पाहणी केली असता त्यांनाही जवळा येथील प्राथमिक आरोग्य केंद्र कुलुपबंद अवस्थेत असल्याचे निदर्शनास आले. उपचारासाठी आलेले २० ते २५ रुग्ण आणि सरपंच उपसरपंचसह गावातील नागरिक तब्बल दीड ते दोन तास आरोग्य केंद्रात ठिय्या मांडून होते. परंतु यादरम्यान एकही अधिकारी कर्मचारी इकडे फिरकला नसल्याने आरोग्य यंत्रणेच्या या गलथान कारभाराबाबत रुग्ण आणि नागरिकात प्रचंड असंतोष निर्माण झाला.

जवळा येथील प्राथमिक आरोग्य केंद्रात कार्यरत असलेले वैद्यकीय अधिकारी तसेच कर्मचारी वारंवार गैरहजर असल्याने येथील रुग्णांची सातत्याने तक्रार आहे याबाबत ग्रामपंचायतीचे सरपंच उपसरपंच तसेच अनेक सदस्य व नागरिकांनी वारंवार संबंधित अधिकारी कर्मचारी तसेच वरिष्ठांकडे तोंडी स्वरूपात तक्रार केली आहे मात्र निर्ढवलेल्या वैद्यकीय यंत्रणेला अद्याप जाग आली नाही हे विशेष.

प्राथमिक आरोग्य केंद्रात आरोग्य सेवेचा दुष्काळ आहे. वारंवार तक्रारी करूनही जिल्हा शल्य चिकित्सक वैद्यकीय अधीक्षक आणि वैद्यकीय अधिकारी यांच्याकडे सातत्याने तक्रारी करूनही आरोग्य केंद्रात कोणतीही सुधारणा होत नाही तसेच कामचुकार अधिकारी कर्मचारी यांच्यावरही कोणतीच कारवाई होत नाही. शनिवारी दुपारी तब्बल २० ते २५ रुग्ण उपचारासाठी आरोग्य केंद्रात आले असता एकही अधिकारी कर्मचारी येथे उपस्थित नव्हता. याबाबत सतत नागरिकांच्या तक्रारी आहेत. अशा अधिकारी कर्मचारी यांच्यावर कठोर कारवाई न झाल्यास आम्हाला वेगळा विचार करावा लागेल

दत्तात्रय बर्वे, मा.सरपंच जवळा.