आम. शहाजीबापू पाटील व मा.आम. दिपकआबा साळुंखे पाटील यांच्या प्रयत्नातून तालुक्यातील ३ मंदिरांच्या विकासासाठी ४ कोटी ४७ लाखांचा निधी मंजूर : जयमालाताई गायकवाड

अकोला येथील श्री सिद्धनाथ मंदिर, जवळा येथील श्री नारायणदेव मंदिर आणि कडलास येथील श्री सोमनाथ मंदिराचा होणार कायापालट..!

सांगोला तालुक्यातील हजारो भाविक भक्तांचे आराध्य दैवत असणारे जवळा येथील श्री नारायणदेव, कडलास येथील श्री. सोमनाथदेव आणि अकोला येथील श्री. सिध्दनाथ या तिन्ही मंदिरांचा तीर्थक्षेत्र विकास आराखड्यात “ब” वर्गात समावेश झाला असून या मंदिराच्या विकासासाठी आमदार शहाजीबापू पाटील आणि माजी आमदार दिपकआबा साळुंखे पाटील यांच्या प्रयत्नातून कोट्यावधी रुपयांचा निधी मंजूर झाला असल्याची माहिती माजी जिल्हा परिषद अध्यक्षा जयमालाताई गायकवाड यांनी दिली.

पुढे बोलताना माजी जिल्हा परिषद अध्यक्ष जयमालाताई गायकवाड म्हणाल्या, मी जिल्हा परिषद अध्यक्ष असताना हजारो लाखो भाविक भक्तांचे आराध्य दैवत असणाऱ्या तालुक्यातील अनेक मंदिरांचा कायापालट करण्यासाठी शासनदरबारी प्रस्ताव पाठवले होते. यापैकी अनेक मंदिरांना तीर्थक्षेत्र म्हणून दर्जा मिळवून दिला. अनेक मंदिरांचा विकास करण्यासाठी कोट्यावधी रुपयांचा निधीही मंजूर केला. यापैकी अकोला येथील श्रीक्षेत्र सिध्दनाथ तीर्थक्षेत्र, कडलास येथील श्रीक्षेत्र सोमनाथ तीर्थक्षेत्र आणि जवळा येथील श्रीक्षेत्र नारायणदेव तीर्थक्षेत्र या मंदिरांनाही भरघोस निधी मंजूर केला होता. या तिन्ही तीर्थक्षेत्रांचा दर्जा उन्नत करण्यासाठी शासनाकडे वारंवार पाठपुरावा सुरू होता. याबाबत तालुक्याचे आमदार शहाजीबापू पाटील आणि मा. आम. दिपकआबा साळुंखे पाटील यांच्या माध्यमातून केलेल्या पाठपुराव्याला यश मिळाले असून सोमवार दि.६ मार्च रोजी मुंबई मंत्रालय येथे ग्राम विकास सचिव यांच्या अध्यक्षतेखाली सदर कामांना मंजुरी देण्यात आली आणि गेली ७ वर्षांपासून शासनाकडे प्रलंबित असणाऱ्या प्रस्तावावर मंजुरीची मोहोर उमटली.

तब्बल ७ वर्षे शासनाकडे प्रलंबित असलेल्या मागणीला यश आल्याने अकोला येथील श्री सिद्धनाथ मंदिरांच्या विकासासाठी २ कोटी, जवळा येथील श्री नारायणदेव मंदिराच्या विकासासाठी १ कोटी २४ लाख रु. तर कडलास येथील श्री सोमनाथ मंदिराच्या विकासासाठी १ कोटी २३ लाख रु. असा एकूण ४ कोटी ४७ लाख रुपयांचा घसघशीत निधी मंजूर झाला आहे. मंजूर निधीतून कडलास येथील श्री सोमनाथ मंदिर परिसरात भक्त निवास बांधणे,यात्री निवास बांधणे तसेच मंदिराचे अन्य सुशोभीकरण करणे अशी विकासकामे होणार आहेत तर जवळा येथील श्री नारायणदेव मंदिर परिसरात भक्त निवास बांधणे, भाविकांसाठी घाट बांधणे, आणि मंदिर परिसराला संरक्षक भिंत बांधणे आणि अन्य सुशोभीकरण कामे करण्यात येतील तसेच अकोला येथील श्री सिद्धनाथ मंदिर परिसरात भक्त निवास बांधणे, यात्रेसाठी राज्यभरातून येणाऱ्या भाविकांना यात्री निवास बांधणे, वाहनतळ बांधणे, मंदिर परिसराला संरक्षक भिंत बांधणे, परिसरात वाढलेली झाडे झुडपे काढणे, मंदिरात सोलर पॅनल बसवणे आणि सुशोभीकरणची अन्य कामे या निधीतून मार्गी लागणार आहेत.
जवळा, अकोला आणि कडलास परिसरातील हजारो भाविक भक्तांची अनेक वर्षांपासून असलेली प्रलंबित मागणी अखेर आमदार शहाजीबापू पाटील आणि माजी आमदार दिपकआबा साळुंखे पाटील यांच्या प्रयत्नातून आणि माजी जिल्हा परिषद अध्यक्ष जयमाला ताई गायकवाड यांच्या पाठपुराव्याने मार्गी लागल्याने भविकातून समाधान व्यक्त होत आहे.

७ वर्षांपासून सुरू होता पाठपुरावा….!!!

मी जिल्हा परिषद अध्यक्ष असताना लाखो भाविक भक्तांचे श्रद्धास्थान असलेल्या या तिन्ही मंदिरांचा कायापालट व्हावा म्हणून याबाबत शासनाकडे प्रस्ताव सादर केला होता.परंतु हे प्रस्ताव मंजुरीच्या प्रतीक्षेत होते. याबाबत आमदार शहाजीबापू पाटील आणि मा. आम. दिपकआबा साळुंखे पाटील यांच्या माध्यमातून सतत पाठपुरावा सुरू ठेवल्याने अखेर या मागणीला यश आले आणि ७ वर्षांची मेहनत सार्थ झाली ;
सौ. जयमालाताई गायकवाड,
मा. जि.प.अध्यक्षा, सोलापूर