माढ्यात महायुतीचा उमेदवार ठरला, अजित पवार गटाकडून काँग्रेसच्या मिनल साठे मैदानात
माढ्यातून राष्ट्रवादी काँग्रेस शरद पवार गटाकडून अखेर अभिजीत पाटील यांना उमेदवारी मिळाली आहे. याचबरोबर विद्यमान आमदार बबनदादा शिंदे यांचे पुत्र रणजित शिंदे यांनी अपक्ष उमेदवारी अर्ज दाखल केला आहे. त्यामुळं महायुतीचा नेमका उमेदवार कोण अशी चर्चा राजकीय वर्तुळात सुरु होती. मात्र, अखेर माढ्यात महायुतीचा उमेदवार ठरला आहे. माढ्याच्या नरगारध्यक्षा आणि काँग्रेसच्या नेत्या अॅड. मिनल साठे यांनी राष्ट्रवादी काँग्रेस अजित पवार गटाकडून उमेदवारी मिळाली.
माढ्यात राजकीय घडामोडींना वेग आला आहे. माढ्याच्या नगराध्यक्षा आणि काँग्रेसच्या नेत्या अॅड. मिनल साठे यांना महायुतीकडून अजित पवार यांच्या राष्ट्रवादी काँग्रेसचे तिकीट मिळाले आहे. मिनल साठे या राष्ट्रवादी काँग्रेस शरद पवार गटाकडून निवडणूक लढवण्यासाठी इच्छुक होत्या. मात्र, त्यांना डावलून शरद पवारांनी अभिजीत पाटील यांना उमेदवारी दिली आहे. त्यामुळं मिनल साठे यांनी राष्ट्रवादी काँग्रेस अजित पवार गटाकडून तिकीट मिळवलं आहे. त्यामुळं माढ्याच्या मैदानात आता तिरंगा सामना रंगणार आहे. विद्यमान आमदार बबनदादा शिंदे यांचे पुत्र रणजित शिंदे यांनी देखील शरद पवार गटाकडे उमेदवारी मागितली होती. मात्र, त्यांना देखील डावलन्यात आलं आहे. त्यामुळं रणजित शिंदे यांनी अपक्ष निवडणूक लढवण्याचा निर्णय घेतला आहे. त्यामुळं माढ्यात रंगतदार तिरंगी लढत होणार आहे.
