पालकमंत्री जयकुमार गोरे यांच्या नगरी सत्कार समारंभाला सर्व कार्यकर्त्यांनी उपस्थित रहावे ; मा. आम. दिपकआबा साळुंखे पाटील यांचे कार्यकर्त्यांना आवाहन
महाराष्ट्र राज्याचे ग्रामविकास व पंचायतराज मंत्री तसेच सोलापूर जिल्ह्याचे पालकमंत्री जयकुमार गोरे यांचा समस्त सांगोल्यातील नागरिकांच्या वतीने गुरुवार दि ३ एप्रिल रोजी सांगोला येथे भव्य नागरी सत्कार आयोजित केला आहे. या सत्कार समारंभासाठी सांगोला विधानसभा मतदारसंघातील तमाम पदाधिकारी, आजी-माजी लोकप्रतिनिधी, तसेच कार्यकर्त्यांनी मोठ्या संख्येने उपस्थित रहावे असे आवाहन माजी आमदार दिपकआबा साळुंखे पाटील यांनी केले आहे.
अत्यंत सामान्य परिवारात जन्म घेतलेल्या ना. जयकुमार गोरे यांनी प्रामाणिकपणे जनतेची सेवा केली. जनतेच्या सेवेसाठी २४ तास उपलब्ध असणाऱ्या जयकुमार गोरे यांना म्हणूनच माण खटावच्या जनतेने सलग तीन वेळा विधानसभेत पाठवले आहे. जनतेशी आणि त्यांच्या प्रश्नांशी बांधील असलेल्या जयकुमार गोरे यांची सोलापूर जिल्ह्याच्या पालकमंत्रीपदी वर्णी लागल्याने आता संपूर्ण जिल्ह्याच्या आणि खासकरून सांगोला विधानसभा मतदारसंघातील जनतेच्या अपेक्षा उंचावल्या आहेत. जयकुमार गोरे हे सांगोला तालुक्याच्या शेजारीच असलेल्या मतदारसंघाचे नेतृत्व करत असल्याने त्यांना सांगोला तालुक्यातील जनतेच्या समस्या माहित आहेत. अत्यंत सामान्य परिवारातुन पुढे आलेल्या जयकुमार गोरे या लढवय्या आणि प्रामाणिक नेतृत्वाचा तमाम सांगोलकरांच्या वतीने सन्मान करणे ही आपल्या सर्वांची जबाबदारी आहे. आगामी काळात सांगोला तालुक्याचे प्रश्न ते नक्कीच सोडवतील असा विश्वास व्यक्त करत गुरुवार दि. ३ मार्च रोजी छत्रपती शिवाजी महाराज चौक सांगोला येथे सायंकाळी ६.३० वा होणाऱ्या सत्कार समारंभाला तमाम सांगोलकरांनी मोठ्या संख्येने उपस्थित रहावे असे आवाहन माजी आमदार दिपकआबा साळुंखे पाटील यांनी म्हटले.
