विद्यार्थी गुणवत्तेबाबत पालकांच्या अपेक्षा पूर्ततेसाठी सज्ज रहा- प्रा.प्रबुद्धचंद्र झपके

सांगोला तालुक्यामध्येच नव्हे तर जिल्ह्यामध्ये “विद्यामंदिर” हा स्पर्धा परीक्षेतील गुणवत्तेबाबत ब्रँड सिद्ध झाला असून या शैक्षणिक वर्षारंभी संस्थेच्या विविध शाखांमध्ये आपल्या पाल्यांचा प्रवेश नोंदवताना पालकांनी गुणवत्तेबाबत ठेवलेल्या अपेक्षांच्या पूर्ततेसाठी तत्पर रहा असे आवाहन प्रा.प्रबुद्धचंद्र झपके यांनी सांगोला विद्यामंदिर प्रशालेमध्ये आयोजित शिष्यवृत्ती मार्गदर्शक शिक्षकांच्या सन्मान सोहळ्यावेळी अध्यक्षस्थानावरून संबोधित करताना केले.

पुढे व्यक्त होताना प्रा.झपके यांनी शिक्षकांनी जास्तीचा वेळ देऊन पूर्णपणे मोफत मार्गदर्शन वर्गाद्वारे केलेल्या अध्यापनातूनच हा आदर्श विद्यामंदिरने उभारला असून इतर ठिकाणी शिक्षण सेवेचा व्यवहार होत असताना विद्यामंदिरमध्ये संस्थापक अध्यक्ष कै.बापूसाहेबांच्या तत्त्वांची जोपासना करताना तळागाळातल्या विद्यार्थ्यांपर्यंत शिक्षणाची गंगा पोहोचवण्यासाठी शिक्षकांचे मौल्यवान सहकार्य लाभत असल्याचे सांगत शिष्यवृत्तीतील यशाची परंपरा कायम ठेवल्याबद्दल त्यांनी शिक्षकांना शाब्बासकी दिली व भविष्यातील जबाबदारीची जाणीव सुद्धा करून दिली.

यावेळी व्यासपीठावर खजिनदार शंकरराव सावंत, सचिव मल्लिकार्जुन घोंगडे, कार्यकारणी सदस्य चंद्रशेखर अंकलगी, कार्यकारणी सदस्या शीलाकाकी झपके यांच्यासह प्राचार्य अमोल गायकवाड, श्रीकांत लांडगे, बिभिषण माने, मुख्याध्यापिका शुभांगी पवार, उपमुख्याध्यापिका शाहिदा सय्यद, उपप्राचार्य प्रकाश म्हमाणे, पर्यवेक्षक प्रदीप धुकटे, उत्तम सरगर, काकासाहेब नरुटे उपस्थित होते.
सांगोला तालुका शिक्षण प्रसारक मंडळ आयोजित या कार्यक्रमामध्ये इयत्ता पाचवी व आठवी शिष्यवृत्ती परीक्षा-2025 मध्ये विद्यामंदिर परिवारातील चार विद्यार्थी राज्य गुणवत्ता यादीत तर तब्बल 88 विद्यार्थी जिल्हा गुणवत्ता यादीत शिष्यवृत्ती पात्र ठरल्याबद्दल सांगोला विद्यामंदिर प्रशाला, नाझरा विद्यामंदिर प्रशाला, कोळा विद्यामंदिर हायस्कूल आणि सांगोला विद्यामंदिर इंग्लिश मीडियम स्कूलमधील इयत्ता पाचवी व आठवीच्या शिष्यवृत्ती मार्गदर्शक शिक्षकांसोबत सर्व प्रशाला बाह्यपरीक्षा विभाग प्रमुख, संस्था बाह्यपरीक्षा विभाग प्रमुख व प्राचार्य यांना गुलाबपुष्प, श्रीफळ व पेढा देत सन्मानित करण्यात आले. कार्यक्रमाचे प्रास्तविक बाह्यपरीक्षा विभाग नियंत्रक प्रदीप धुकटे यांनी केले.

सूत्रसंचालन वैभव कोठावळे यांनी तर आभार संस्था बाह्यपरीक्षा विभाग प्रमुख नामदेव खंडागळे यांनी मानले.यावेळी सर्व शाखांमधील शिक्षक-शिक्षिका उपस्थित होते. कार्यक्रम यशस्वी करण्यासाठी उत्सव विभागाच्या नरेंद्र होनराव यांच्यासह सर्व शिक्षक-शिक्षकेतर कर्मचाऱ्यांनी परिश्रम घेतले. चहापानानंतर कार्यक्रमाची सांगता करण्यात आली.