सांगोला ( प्रतिनिधी): भारतीय जनता पक्षाचे संघटन मजबूत करण्यासाठी प्रत्येकाला जबाबदारीने आणि नियोजनबध्द काम करणे आवश्यक आहे. इतर पक्षाप्रमाणे भारतीय जनता पक्षात घराणेशाही नाही. नेत्यांपासून ते सामान्य कार्यकर्त्यांच्या अडचणी फक्त भाजपमध्ये जाणून घेतल्या जातात. भाजप हा कार्यकर्त्यांचा विचार करणारा पक्ष आहे. भाजपच्या विद्यमान खासदारांनी शेती, रस्त्यांचा प्रश्न सोडविण्यासाठी अथक परिश्रम घेतले आहेत. राज्यात जातीपातीत भांडणे लावण्याचे उद्योग विरोधक करीत आहेत. भाजप जिल्हाध्यक्षांनी जिल्ह्यात भाजपचे संघटन मजबूत केले असून याचा फायदा लोकसभा निवडणुकीत होणार आहे. येणाऱ्या लोकसभा निवडणुकीत भाजपच्या कार्यकर्त्यांनी तयारीला लागावे. मोदी सरकारच्या योजनांची माहिती प्रत्येक जनतेपर्यंत पोहोचवावी. देशात विकासाची गंगा पंतप्रधान नरेंद्र मोदींच्या काळात सुरू झाली असल्याचे मत भाजपचे पश्चिम महाराष्ट्र संघटन मंत्री मकरंद देशपांडे यांनी व्यक्त केले.
सांगोल्यात भाजपचे बूथ संमेलन संपन्न झाले. यावेळी पश्चिम महाराष्ट्र सघंटन मंत्री मकरंद देशपांडे, पश्चिम महाराष्ट्र विभाग बूथ संयोजक योगेश बाचल, भाजपचे जिल्हाध्यक्ष चेतनसिंह केदार सावंत, जिल्हा सरचिटणीस सचिन शिंदे, तालुकाध्यक्ष अतुल पवार, दुर्योधन हिप्परकर, संभाजी आलदर, माढा विस्तारक अनंत राऊत, सांगोला विस्तारक हणमंत करचे, शिवाजीराव गायकवाड, एन.वाय. भोसले, नवनाथ पवार, वसंत सुपेकर, दिलीप सावंत, संजय गंभीरे, आनंद फाटे यांच्यासह भाजपचे सुपर वॉरियर्स, बूथ प्रमुख, शक्ती केंद्र प्रमुख उपस्थित होते. यावेळी महाराष्ट्र विभाग बूथ संयोजक योगेश बाचल यांनी बूथ प्रमुख, शक्ती केंद्र प्रमुख, सुपर वॉरियर्स यांना मार्गदर्शन केले.
यावेळी जिल्हाध्यक्ष चेतनसिंह केदार-सावंत म्हणाले, भारतीय जनता पक्ष हा कार्यकर्ता जपणारा पक्ष असून पक्षात पक्ष संघटनेला महत्त्व आहे. देशात भाजपने सर्वत्र मिळवलेल्या विजयाचे श्रेय आपल्या संघटनात आहे. प्रत्येक गावापर्यंत जाऊन तळागाळातील कार्यकर्त्यांपर्यंत पोहोचून केलेले मजबूत संघटन हीच भाजपची ताकद आहे. तिसरी बार मोदी सरकार, अब की बार ४०० पारसाठी भाजपच्या कार्यकर्त्यांनी तयारीला लागावे. कार्यकर्त्यांच्या बळावरच लोकसभेला पुन्हा आपण ताकद दाखवू, असा विश्‍वास भाजपचे जिल्हाध्यक्ष चेतनसिंह केदार-सावंत यांनी व्यक्त केला.
