११ गावांची शिरभावी पाणीपुरवठा योजनेकडे मागणी- तहसीलदार संतोष कणसे

सांगोला (तालुका प्रतिनिधी): भीषण उन्हाळ्यामुळे सांगोला तालुक्यातील २८ गावांतर्गत २३५ वाड्यावस्त्यांवर ४१ टँकरच्या दैनंदिन ७२ खेपातून ७ लाख लीटर पाणीपुरवठा करून सुमारे ६८,६०० नागरिकांसह जनावरांची तहान भागवली जात आहे. ८२ गावच्या शिरभावी प्रादेशिक नळपाणीपुरवठा योजनेतून सुमारे ४० गावांसह चार संस्थाना मागणीनुसार पाणीपुरवठा चालू आहे. कोळे, इटकी, सोमेवाडी, तरंगेवाडी, एखतपूर, हलदहिवडी, वाढेगाव, बुरलेवाडी, डिकसळ, पारे, राजुरी अशा ११ गावांची शिरभावी पाणीपुरवठा योजनेकडे मागणी वाढल्याचे तहसीलदार संतोष कणसे यांनी सांगितले.

     चालूवर्षी भीषण दुष्काळामुळे सांगोला तालुक्यातील गाव, वाडीवस्तीवर पिण्याच्या पाण्याची टंचाई जाणवू लागली आहे. गतवर्षी तालुक्यात कमी पर्जन्यमान झाल्यामुळे भूगर्भातील पाण्याची पातळी कमी होत गेली. त्याचा परिणाम ग्रामीण पाणीपुरवठ्याच्या विहिरींवर झाला तर हातपंपाची पाणीपातळीही खोलवर गेल्यामुळे ग्रामपंचायतीकडून वाड्यावस्त्यावर टँकरने पाणीपुरवठा करण्यासाठी टप्प्याटप्प्याने टँकरचे प्रस्ताव ग्रामीण पाणीपुरवठा विभाग व तहसीलदार सांगोला यांच्याकडे प्राप्त होत आहेत.

         तालुक्यातील सोनलवाडी, बागलवाडी, लक्ष्मीनगर, कटफळ, अचकदाणी, यलमर-मंगेवाडी, अजनाळे, डोंगरगाव, लोटेवाडी, वासुद, इटकी, पारे, महूद, चिनके, वाकीशिवणे, शिवणे, खवासपूर, सोमेवाडी, घेरडी, एखतपूर, मांजरी, कमलापूर, वाढेगाव, आगलावेवाडी, कोळा, हणमंतगाव, धायटी या २८ गावांतर्गत २३५ वाड्यावरील ६८ हजार ६०० नागरिकांसह जनावरांना ४१ टँकरने पाणीपुरवठा सुरू आहे.