खरीप दुष्काळी अनुदान न मिळालेल्या शेतकऱ्यांना १० जुलै पर्यंत कागदपत्रांची पुर्तता करण्याचे आवाहन

सोलापूर – सन २०२३ मधील खरीप दुष्काळाच्या अनुषंगाने ५ लाख १९ हजार ८४९ बाधित शेतकरी यांना ६८९ कोटी अनुदान महसूल व वन विभागाकडील दि.२९ फेब्रुवारी २०२४ रोजीच्या शासन निर्णयान्वये मंजूर झालेले असल्याची माहिती निवासी उपजिल्हाधिकारी तथा जिल्हा आपत्ती व्यवस्थापन प्राधिकरणचे मुख्य कार्यकारी अधिकारी मनीषा कुंभार यांनी दिली आहे.

त्यामध्ये बार्शी, माढा, करमाळा, सांगोला आणि माळशिरस या तालुक्यांचा समावेश आहे.  अनुदान बार्शी तालुक्यातील ३१३९५ बाधित शेतकरी, माढा तालुक्यातील ७६७२४ बाधित शेतकरी, करमाळा तालुक्यातील ७२११३ बाधित शेतकरी, सांगोला तालुक्यातील ७५६१६ बाधित शेतकरी आणि माळशिरस तालुक्यातील ७७९५१ बाधित शेतकऱ्यांना मदत निधी वितरीत करण्यासाठी सबंधित तहसिलदार यांनी बाधित शेतक-यांची यादी ई पंचनामा पोर्टलवर अपलोड केली आहे.  या यादीला जिल्हाधिकारी कार्यालयाकडून मंजूरी दिली आहे.
शेतकऱ्यांच्या खात्यावर थेट मदत जमा करण्यात आलेली आहे.  यामध्ये  बार्शी तालुक्यातील २१२५२, माढा तालुक्यातील ६४८७१, करमाळा तालुक्यातील ६२८५९, सांगोला तालुक्यातील ६४६५० आणि माळशिरस तालुक्यातील ६३७९२ असे एकुण २७७४२४ बाधित शेतकऱ्यांना रक्कम ४८९ कोटी मदतीचा समावेश आहे.

सद्यस्थितीत बार्शी तालुक्यातील ३५५०, माढा तालुक्यातील ३२४०, करमाळा तालुक्यातील १९७०,सांगोला तालुक्यातील ३६७८ आणि माळशिरस तालुक्यातील ५४२८ बाधित शेतकऱ्यांचे ई-केवायसी पूर्ण न झालेने रक्‍कम २१,६५,५६,४९५/-रुपये प्रलंबित आहे.  तसेच सोलापूर जिल्हयातील अंदाजित १ लाख खातेदारांना त्यांची बँक व आधारकार्ड संलग्न नसलेमुळे, सामाईक खातेदारांची कोणच्या खातेवर रक्कम जमा करावी याबाबतची संमतीपत्र दिले नसल्याने, मयत खातेदारांची वारस नोंद झाली नसल्याने तसेच परगावीच्या खातेदारांचे बॅक तपशील, आधारकार्ड तपशील इ. उपलब्ध न झाल्याने अनुदान वाटप करणे प्रलंबित आहे.

जिल्हाधिकारी सोलापूर यांनी उपरोक्त नमूद कारणामुळे अनुदान न मिळालेल्या खातेदारांनाकागदपत्रांची पुर्तता करणे बाबत संबंधित तलाठी कार्यालय अथवा तहसिल कार्यालय यांचेकडे दिनांक १० जुलै, २०२४ पूर्वी संपर्क करणेचे आवाहन केले असल्याचे प्रसिध्दी पत्रकात नमूद आहे.