संजय कोकरे:- पंढरपूर येथील पत्रकार भवन येथे रविवार दिनांक 4 ऑगस्ट रोजी सकाळी 11 वाजता श्री विठ्ठलाच्या प्रतिमेचे पूजन प्रमुख मान्यवर व पत्रकारांचे हस्ते करण्यात आले. कार्यक्रमाचे प्रस्ताविक प्रदेश सहसचिव हरिभाऊ प्रक्षाळे यांनी केले. याप्रसंगी पंढरपूर येथे पत्रकारांचे राज्य अधिवेशन व पत्रकारांच्या समस्या अडीअडचणी तसेच पत्रकारांच्या निवास इत्यादी प्रश्न प्रास्ताविक करताना उपस्थित केले. मनोगत व्यक्त करताना ज्येष्ठ मार्गदर्शक पत्रकार महेश खिस्ते, सुनील उंबरे, शिवाजी शिंदे, प्रशांत आराध्ये यांनी बरेच प्रश्न उपस्थित करत पत्रकारांच्या अडीअडचणी समस्या विषयी सांगितले.
यावेळी जेष्ठ पत्रकार व मुख्यमंत्री एकनाथ शिंदे यांचे माध्यम सल्लागार कार्यक्रमाचे प्रमुख पाहुणे विनायक पाथरूडकर म्हणाले की पत्रकारांना काम करताना मोठा दबाव असतो मात्र ही स्पर्धा आहे. ही टाळता येत नाही. राजकीय नेत्यांच्या मनामध्ये काय चालू आहे ते कोणालाच कळत नाही. मात्र राज्याचे मुख्यमंत्री एकनाथ शिंदे हे संवेदनशील मुख्यमंत्री असल्याने पत्रकारांच्या विविध समस्या आणि अडचणी सोडवण्यासाठी त्यांची कायम सकारात्मक भूमिका असते यामुळे पंढरपुरातील पत्रकारांच्या घरकुलाचा प्रश्न मार्गी लावण्यासाठी पंढरपुरातील पत्रकारांच्या शिष्टमंडळाने मुख्यमंत्र्यांची भेट घेतल्यास पत्रकारांच्या घरकुलाचा प्रश्न मिटेल असा विश्वास मुख्यमंत्री एकनाथ शिंदे यांचे माध्यम सल्लागार विनायक पाथरूडकर यांनी पंढरपूर येथील पत्रकारांना दिला.
ते पंढरपूर येथील पत्रकार भवन येथे महाराष्ट्र राज्य मराठी पत्रकार संघाच्या वतीने आयोजित करण्यात आलेल्या कार्यक्रमात बोलत होते.यावेळी त्यांनी मुख्यमंत्री एकनाथ शिंदे यांच्याबरोबर काम करताना आलेल्या अनुभवाचा प्रसंग सांगितला.
यावेळी मार्गदर्शन करताना महाराष्ट्र राज्य मराठी पत्रकार संघाचे प्रदेशाध्यक्ष किरण जोशी यांनी पंढरपूर येथे राज्यातील पत्रकारांचे अधिवेशन घेण्याचा मानस व्यक्त करत पत्रकार संघाच्या वतीने पत्रकारांसाठी पुण्यात उभारण्यात येणाऱ्या मीडिया टॉवर यासह विविध कामांची थोडक्यात माहिती दिली.
यावेळी त्यांनी पंढरपुरात जेवढ्या प्रमाणात व्हीआयपी येत असतात यामुळे येथील पत्रकारही व्हीआयपी झाला पाहिजे यासाठी नूतन कार्यकारणी काम करेल आणि पत्रकार भवन आणि घरकुलाचा प्रश्न मार्गी लागेल असा विश्वास देत नूतन कार्यकारणीला शुभेच्छा दिल्या.
यावेळी महाराष्ट्र राज्य मराठी पत्रकार संघाच्या पंढरपूर येथील नूतन कार्यकारणी अध्यक्ष वीरेंद्रसिंह उत्पात, सहअध्यक्ष दिनेश खंडेलवाल, कार्याध्यक्ष माऊली डांगे, सचिव अपराजित सर्वगोड, सहसचिव, विकास पवार, उपाध्यक्ष रविंद्र लव्हेकर,प्रसिद्धीप्रमुख सोहन जैस्वाल यासह सदस्यांना नियुक्तीपत्र देण्यात आले.
या कार्यक्रमासाठी प्रमुख पाहुणे म्हणून मुख्यमंत्र्यांचे माध्यम सल्लागार विनायक पाथरूडकर, प्रदेशाध्यक्ष किरण जोशी , प्रदेश सहसचिव हरिभाऊ प्रक्षाळे उपस्थित होते. यावेळी व्यासपीठावर पत्रकार महेश खिस्ते, सुनील उंबरे, शिवाजी शिंदे, प्रशांत आराध्ये उपस्थित होते. सदर या कार्यक्रमाला पत्रकार बांधवांनी मोठ्या संख्येने हजेरी लावली होती. शेवटी पंढरपूर शहराध्यक्ष वीरेंद्रसिंह उत्पात यांनी पत्रकार संघाचे संघटन वाढवण्याचे सांगून उपस्थितांचे आभार मानले.
