रवी राणांनी बच्चूभाऊंना पुन्हा डिवचलं, म्हणाले, ‘शेवटची फडफड सुरु’

मुंबई: गेल्या काही दिवसांपासून भाजप पुरस्कृत आमदार रवी राणा आणि शिंदे गटाचे आमदार बच्चू कडू यांच्यात सुरु असलेला वाद आणखी विकोपाला जाण्याची शक्यता आहे. कारण, बच्चू कडू यांनी या वादात मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांनी हस्तक्षेप करण्याची मागणी केली होती. मात्र, भाजपच्या कोणत्याही नेत्याकडून अद्याप याप्रकरणात भाष्य करण्यात आलेले नाही. तर दुसऱ्या बाजूला रवी राणा (Ravi Rana) यांनी बच्चू कडू यांच्यावर बोचरी टीका करणे सुरूच ठेवले आहे. रवी राणा यांनी गुरुवारी रात्री एक ट्विट केला. या ट्विटमधून राणा यांनी बच्चू कडू यांच्यावर अप्रत्यक्षपणे निशाणा साधला आहे.

   

बच्चू कडू यांनी नुकतीच नागपूरमध्ये पत्रकार परिषद घेतली होती. यावेळी त्यांनी रवी राणा यांच्यावर आगपाखड केली होती. हाच धागा पकडत रवी राणा यांनी आपल्या ट्विटमधून बच्चू कडू यांना अप्रत्यक्षपणे डिवचले आहे. दिवा जेव्हा विझतो तेव्हा तो फडफड करतो, त्यातला ‘हा’ एक दिवा आहे, दिवाळीत खूप फटाके फुटले त्यातला ‘हा’ फुसका फटाका आहे, असे रवी राणा यांनी ट्विटमध्ये म्हटले आहे. त्यामुळे आता बच्चू कडू यावर काय प्रतिक्रिया देणार, याकडे सर्वांच्या नजरा लागल्या आहेत.

   

एकनाथ शिंदे आणि देवेंद्र फडणवीस हे दिवाळीनंतर बच्चू कडू आणि रवी राणा यांना समोरासमोर बसवून त्यांच्यातील वाद मिटवतील, अशी चर्चा राजकीय वर्तुळात सुरु होती. मात्र, अद्याप तशा कोणत्याही हालचाली घडताना दिसत नाहीत. याउलट शाब्दिक लढाईमुळे रवी राणा आणि बच्चू कडू यांच्यातील वाद आणखीनच विकोपाला जाताना दिसत आहे.