योजनांच्या प्रदर्शनाची ग्रामीण भागात खरी गरज : भाजपा जिल्हाध्यक्ष चेतनसिंह केदार-सावंत; अलोट प्रतिसादांने झाली समृद्ध महाराष्ट्र प्रदर्शनाची सांगता

सांगोला (प्रतिनिधी) : खा. रणजितसिंह नाईक निंबाळकर यांच्या संकल्पनेतून आणि भाजपा जिल्हाध्यक्ष चेतनसिंह केदार सावंत यांच्या मार्गदर्शनाखाली सांगोला येथील रामकृष्ण व्हिला येथे भरलेल्या केंद्र सरकारच्या विविध योजनांची माहिती देणारे “समृद्ध महाराष्ट्र २०२३” या प्रदर्शनाची शुक्रवारी मान्यवरांच्या उपस्थितीत सांगता झाली. गेल्या तीन दिवसांपासून रंगलेल्या या प्रदर्शनाला १५ हजारांहुन अधिक शालेय व महाविद्यालयीन विद्यार्थी, शेतकरी आणि नागरिकांनी भेट दिली. अपूर्व प्रतिसादात सांगता झालेल्या या सोहळयाला फलटणचे अमरसिंह नाईक-निंबाळकर, पोलिस उपविभागीय अधिकारी विक्रांत गायकवाड़, तहसीलदार संजय खडतरे, गटविकास अधिकारी आनंद लोकरे, जयकुमार शिंदे, पोलिस निरीक्षक अनंत कुलकर्णी, भाजपा जिल्हाध्यक्ष चेतनसिंह केदार सावंत, शिवाजीराव गायकवाड, आनंद फाटे, विजय बाबर, वसंत सुपेकर, एम.आर. गायकवाड, प्रमुख अतिथि उपस्थित होते.

       आतापर्यंत फक्त महानगरामध्ये होणारे प्रदर्शन हे प्रथमच सांगोला सारख्या ग्रामीण भागात आयोजित करण्यात आले होते. यामध्ये केंद्र सरकारच्या विविध विभागांनी सहभाग घेतला होता. भारतीय रिझर्व बॅंक, जिओलॉजिकल सर्वे ऑफ इंडिया, ओएनजीसी, मेडिकल रिसर्च कॉन्सिल ऑफ इंडिया, भारतीय मानक ब्युरो, जलशक्ती मंत्रालय यासारख्या विविध 38 विभागातील अधिकारी व कर्मचाऱ्यांनी त्यांच्या विभागाशी संबंधित माहिती नागरिकांना दिली.

प्रारंभी भाजपा जिल्हाध्यक्ष चेतनसिंह केदार यांनी प्रास्ताविक करताना शासकीय योजनांच्या प्रदर्शनाची ग्रामीण भागात खरी गरज असल्याचे सांगितले. यानंतर जयकुमार शिंदे, डिवाइएसपी विक्रांत गायकवाड आणि अमरसिंह नाईक निंबाळकर यांनी मनोगते व्यक्त केली. यावेळी राजू शिंदे आणि बंडू पाटील यांचा सन्मान करण्यात आला.